ANA KIDUNG RUMEKSA ING WENGI

ANA KIDUNG RUMEKSA ING WENGI

1. Ana kidung rumeksa ing wengi,
   teguh hayu luputa ing lara,
   luputa bilahi kabeh
   jim setan datan purun
   paneluhan tan ana wani
   miwah panggawe ala
   gunaning wong luput
   geni atemahan tirta
   maling adoh tan ana ngarah ing mami
   guna duduk pan sirna
   
2. Sakehing lara pan samya bali
   sakeh ngama pan sami miruda
   welas asih pandulune
   sakehing braja luput
   kadi kapuk tibaning wesi
   sakehing wisa tawa
   sato galak tutut
   kayu aeng lemah sangar
   songing landak guwaning wong
   lemah miring
   myang pakiponing merak
   
3. Pagupakaning warak sakalir
   nadyan arca myang sagara asat
   temahan rahayu kabeh
   apan sarira ayu
   ingideran kang widadari
   rineksa malaikat
   lan sagung pra rasul
   pinayungan ing hyang sukma
   ati Adam utekku baginda Esis
   pangucapku ya Musa
   
4. Napasku nabi Ngisa linuwih
   nabi Yakup pamiyarsaningwang
   Dawud suwaraku mangke
   nabi Brahim nyawaku
   nabi Sleman kasekten mami
   nabi Yusuf rupengwang
   Edris ung rambutku
   baginda Ngali kulitingwang
   Abu bakar getih daging
   Ngumar singgih
   balung baginda Ngusman
   
5. Sungsumingsun Patimah linuwih
   Siti Aminah bayuning angga
   Ayup ing ususku mangke
   Nabi Nuh ing jejantung
   Babi Yunus ing otot mami
   netraku ya Muhamad
   pamuluku Rosul
   pinayungan Adam Kawa
   sampun pepak sakathahe para nabi
   dadya sarira tunggal.
   
   ( Oleh : Sunan Kalijogo)